ਖੁਦਾ ਕਰੇ ਕਿ ਸ਼ੀਸ਼ਾ, ਬੇਜ਼ੁਬਾਨ ਰਹੇ
ਅਸਲ ਚਿਹਰੇ ਤੋਂ, ਆਦਮੀ ਘਬਰਾਇਆ ਹੈ
ਕੋਈ ਹਿੰਦੂ ਜਾਂ ਮੁਸਲਮਾਨ, ਨਹੀਂ ਹੈ ਮੇਰਾ
ਹੋਵੇ ਇਨਸਾਨ ਤਾਂ, ਮੇਰਾ ਹਮਸਾਇਆ ਹੈ
ਤੁਰ ਚੱਲਿਆਂ ਤੋਂ, ਕੀ ਉੱਮੀਦ ਮੁਹੱਬਤ ਦੀ
ਉਹੀ ਅਪਣਾ ਹੈ, ਜੋ ਸਾਹ, ਮੁਡ਼ ਆਇਆ ਹੈ
ਖੌਰੇ ਪਾਗਲ ਹਾਂ, ਉਹਨਾਂ ਤੇ ਹੱਸਦਾ ਹਾਂ
ਜਿਨ੍ਹਾਂ ਗੱਲਾਂ ਨੇ, ਬਹੁਤ ਰਵਾਇਆ ਹੈ
ਮੈਂ ਲੁਟਾਉਂਦਾ ਰਿਹਾ, ਦੌਲਤ ਦਿਲ ਦੀ
ਮੇਰੀ ਫ਼ਿਤਰਤ ਨੇਂ, ਬਹੁਤ ਸਤਾਇਆ ਹੈ
ਮਾਰੋ ਉਸਨੂੰ, ਉਹ ਅਸਲੋਂ ਕਾਫ਼ਿਰ ਹੈ
ਰੱਬ ਦੀ ਥਾਵੇਂ ਉਸ ਇਸ਼ਕ ਬਿਠਾਇਆ ਹੈ
ਕਾਫ਼ਿਰ
ਬਹਿਰ ਰਮਲ ਮਸੱਮਨ ਮਹਿਜੂਫ਼
2122 2122 2122 212
ਬੋਝ ਅਮਲਾਂ ਦਾ ਰਿਹਾ ਜੇ ਰੂਹ ਦੇ ਉੱਤੇ ਮਰਦਿਆਂ
ਆਖ਼ਰਤ ਦਾ ਲੁਤਫ਼ ਹੀ ਜਾਂਦਾ ਰਹੇਗਾ ਡਰਦਿਆਂ
ਗੀਤ ਕੋਈ ਚਾਹਤਾਂ ਦਾ ਇਸ ਜਨਮ ਤਾਂ ਗਾ ਲਵਾਂ
ਖੁੰਝ ਨਾਂ ਜਾਵੇ ਸਮਾਂ ਇਹ ਸਾਜ਼ ਨੂੰ ਸੁਰ ਕਰਦਿਆਂ
ਹੈ ਅਜਬ ਇਹ ਕਾਇਦਾ ਕੇ ਹਾਰਿਆਂ ਦੀ ਜਿੱਤ ਹੈ
ਦਿਲ ਹਜ਼ਾਰਾਂ ਮਿਲ ਗਏ ਮੈਨੂੰ ਖੁਦੀ ਨੂੰ ਹਰਦਿਆਂ
ਜੇ ਇਬਾਦਤ ਨਾਂ ਬਣੇ ਤਾਂ ਇਸ਼ਕ ਵੀ ਕੀ ਇਸ਼ਕ ਹੈ
ਯਾਰ ਅੰਦਰ ਹੀ ਖੁਦਾ ਮਿਲਦਾ ਮੁਹੱਬਤ ਕਰਦਿਆਂ
ਜੋ ਕਲਮ ਨੂੰ ਹੈ ਰਵਾਨੀ ਉਸ ਖੁਦਾ ਦਾ ਸ਼ੁਕਰ ਹੈ
ਉਹ ਲਿਖਾਵੇ ਤਾਂ ਲਿਖਾਂ ਮੈਂ ਯਾਦ ਉਸਨੂੰ ਕਰਦਿਆਂ
ਜਗਜੀਤ ਕਾਫ਼ਿਰ
9815160863
