ਪਹਿਚਾਣ

ਤੂੰ ਕੌਣ ਏਂ
ਇਹ ਸਵਾਲ ਝੰਝੋੜਦਾ ਹੈ
ਮੇਰੇ ਆਪੇ ਨੂੰ ਬੇਲਿਹਾਜ
ਨਾਕਾਮ ਕੋਸ਼ਿਸ਼ ਕਰਦਾ ਹਾਂ
ਗੁਮਰਾਹ ਕਰਨ ਦੀ
ਤਰਕ ਦੇ ਰਾਹੀਂ
ਪਰ ਮੈਂ ਤਾਂ ਜਾਣਦਾ ਹਾਂ
ਕਿਨੀਂ ਕੁ ਭਾਰੀ ਹੈ
ਮੇਰੇ ਮੁਖੋਟਿਆਂ ਦੀ ਪੰਡ

ਭਟਕਣ

ਉੱਮੀਦ
ਇਹੋ ਤਾਂ ਚਾਹੀਦੀ ਹੈ
ਜਿਉਣ ਲਈ
ਕੁਝ ਕਰਨ ਲਈ
ਇਹ ਸਜਦੇ ਇਹ ਇਬਾਤਤਾਂ
ਇਹ ਮੁਹਬੱਤਾਂ
ਜ਼ਰੀਆ ਹੀ ਤਾਂ ਨੇ
ਖੁਦੀ ਨੂੰ ਪਰਚਾਉਣ ਦੇ
ਰੋਸ਼ਨੀ
ਜੋ ਸੁਨੇਹਾ ਏ
ਰੂਹ ਨੂੰ ਅਰੂਹ ਦਾ
ਤਾਰੀਕੀਆਂ ਦੇ ਅੰਤ ਦਾ
ਸਭ ਖਿਆਲ ਨੇ
ਇਹ ਰਮਜ਼ ਜਾਣਦਾ ਹਾਂ
ਲਫ਼ਜ਼ਾਂ ਦੀ ਖੇਡ ਵਿਚ
ਮਾਹਿਰ ਹਾਂ ਕਾਫਿਰ
ਆਪੇ ਨੂੰ ਭਰਮਾਉਣ ਲਈ
ਕੋਈ ਸ਼ਬਦ ਜਾਲ ਦੱਸ
ਮੇਰੀ ਬੇਚੈਨੀਆਂ ਦਾ
ਕੋਈ ਇਲਾਜ਼ ਦੱਸ
ਬੇਅਰਥ ਨੇ ਮੁਕਾਮ
ਦੌਲਤ ਦੇ ਸ਼ੋਹਰਤਾਂ ਦੇ
ਸੁਰਖਰੂ ਹੋ ਜਾਵਾਂ
ਨਫਸਾਂ ਦੇ ਬੋਝ ਤੋਂ
ਜੇ ਹੋ ਸਕੇ ਖੁਦਾਯਾ
ਅਜੇਹੀ ਤਲਾਸ਼ ਦੱਸ

ਮੈਂ ਖੋ ਗਿਆ

ਮੈਂ ਖੋ ਗਿਆ ਹਾਂ
ਤੇਰੇ ਹੀ ਖਿਆਲ ਵਿੱਚ
ਹਾਸਲ ਹੋਏ ਮਲਾਲ ਵਿੱਚ
ਇੱਕ ਸਿੱਧੇ ਜਿਹੇ ਸਵਾਲ ਵਿੱਚ
ਮੈਂ ਖੋ ਗਿਆ ਹਾਂ
ਰਿਸ਼ਤਿਆਂ ਦੇ ਜਾਲ ਵਿੱਚ
ਜਜ਼ਬਿਆਂ ਦੀ ਭਾਲ ਵਿੱਚ
ਗੁਜ਼ਰੇ ਹਰ ਸਾਲ ਵਿੱਚ
ਮੈਂ ਖੋ ਗਿਆ ਹਾਂ
ਵਕਤ ਦੀ ਚਾਲ ਵਿੱਚ
ਲੋੜਾਂ ਦੇ ਜੰਜਾਲ ਵਿੱਚ
ਬੱਸ ਆਟੇ ਦਾਲ ਵਿੱਚ
ਮੈਂ ਖੋ ਗਿਆ ਹਾਂ
ਬੇਬਸੀ ਦੇ ਹਾਲ ਵਿੱਚ
ਅਾਪੇ ਦੀ ਸੰਭਾਲ ਵਿੱਚ
ਉਮੀਦ ਦੇ ਜਲਾਲ ਵਿੱਚ
ਮੈਂ ਖੋ ਗਿਆ ਹਾਂ

ਵਿਅੰਗ ਆਪਣੇ ਆਪ ਤੇ

ਅੈਂਵੇ ਦਾਗ਼ ਕਲਮ ਨੂੰ ਲਾਇਆ
ਸ਼ਾਇਰੀ ਦਾ ਵੀ ਮਾਣ ਘਟਾਇਆ
ਖਿਆਲਾਂ ਦੇ ਬੇਢਂਗੇ ਪਿੰਜਰ ਨੂੰ
ਖਿੱਚ ਗਜਲ ਦਾ ਜਾਮਾ ਪਾਇਆ
ਤੂੰ ਕੀ ਜਾਣੇ ਅਦਬ ਦੇ ਮਾਇਨੇ
ਲਫ਼ਜ਼ਾਂ ਸਤਰਾਂ ਦਾ ਜੋੜ ਬਿਠਾਇਆ
ਫਿਰਾਕ ਵਸਲ ਦੀ ਗੱਲਾਂ ਕਰਦਾ
ਦੱਸ ਤੂੰ ਕਿਹਡ਼ਾ ਇਸ਼ਕ ਕਮਾਇਆ
ਰੱਬ ਨਾਲ ਗੱਲਾਂ ਕਰਦਾ ਫਿਰਦਾ
ਦੱਸ ਕਦੋਂ ਤੂੰ ਰੱਬ ਧਿਆਇਆ
ਫੋਕੀ ਵਾਹ ਵਾਹ ਦੇ ਚੱਕਰ ਵਿਚ
ਵਾਹ ਵਾਹ ਦਾ ਤੂੰ ਰੱਟਾ ਲਾਇਆ
ਲੱਭ ਲੱਭ ਕੇ ਤਸਵੀਰਾਂ ਲਾਉਨੈਂ
ਕੰਧਾ ਦਾ ਵੀ ਰੂਪ ਗਵਾਇਆ
ਅਜੇ ਵੀ ਹਟਜਾ, ਮੰਨਜਾ ਕਾਫਿਰ,
ਕਿਉਂ ਤੂੰ ਆਪਣਾ ਨਾਮ ਡੁਬਾਇਆ

सवाल

ये जो मसरूफ है तेरी इबादत में,
हर ज़र्रा कायनात का ।
फिर क्यों है गुजश्ता दोज़ख सी,
ज़िन्दगी इंसान की ?

ਇੱਕ ਚੁੱਪ

ਇੱਕ ਚੁੱਪ ਦਿਲਾਂ ਦਾ ਹਿਸਾਬ
ਇੱਕ ਚੁੱਪ ਜਦੋਂ ਟੁੱਟਦੇ ਖੁਆਬ
ਇੱਕ ਚੁੱਪ ਨੈਣੀਂ ਡੁਲੱਦਾ ਜੋ ਆਬ
ਇੱਕ ਚੁੱਪ ਅੱਖਾਂ ਬਣੀਆਂ ਬੇ ਆਬ
ਇੱਕ ਚੁੱਪ ਬਣੀ ਰੂਹ ਦਾ ਅਜ਼ਾਬ
ਇੱਕ ਚੁੱਪ ਢੁੱਕੀ ਬਣ ਕੇ ਸਵਾਬ
ਇੱਕ ਚੁੱਪ ਮੇਰੀ ਮੈਂ ਦਾ ਨਕਾਬ
ਇੱਕ ਚੁੱਪ ਰੁਸਵਾਈ ਦਾ ਹਿਜਾਬ
ਇੱਕ ਚੁੱਪ ਪੜੇ ਕੋਰੀ ਕਿਤਾਬ
ਇੱਕ ਚੁੱਪ ਸਹੇ ਲਫ਼ਜ਼ਾਂ ਦੀ ਤਾਬ
ਇੱਕ ਚੁੱਪ ਬੇਵਫਾਈ ਦਾ ਖਿਤਾਬ
ਇੱਕ ਚੁੱਪ ਦੂਜੀ ਚੁੱਪ ਦਾ ਜਵਾਬ

ਲਮਹਾ

ਇੱਕ ਲਮਹਾ
ਅੱਜ ਵੀ ਜਿੰਦਾ
ਵਰੇਅਾਂ ਤੋਂ ਬਾਅਦ ਵੀ
ਮੇਰਾ ਇੱਕ ਸਵਾਲ
ਤੇਰਾ ਇੱਕ ਜਵਾਬ
ਬਾਕੀ ਨੇ ਅਜੇ
ਮੇਰੇ ਮਹਬੂਬ
ਕਿੱਥੇ ਹੈਂ ਤੂੰ
ਦੁਨੀਆਂ ਦੀ ਭੀਡ਼ ਵਿੱਚ
ਉਮਰਾਂ ਦਾ ਇੰਤਜ਼ਾਰ
ਸਬਰਾਂ ਦੀ ਇੰਤੇਹਾ
ਰੂਹ ਤੇ ਭਾਰੂ ਏ
ਸੋਚਾਂ ਦੇ ਵਾਵਰੋਲੇ
ਤੇ ਖਵਾਬਾਂ ਦੇ ਉਹ ਦੀਦਾਰ
ਕੀ ਇਹੋ ਹਾਸਲ ਹੈ
ਤੇਰੀ ਮੇਰੀ ਮੁਹਬੱਤ ਦਾ

ਮੇਰੇ ਮੋਲਾ

ਮੇਰੇ ਮੋਲਾ
ਚਲ ਆਪਾਂ ਦੋ ਗੱਲਾਂ ਕਰੀਏ
ਛੱਡ ਕੇ ਸੁਰਗ ਨਰਕ ਦੀ ਗੱਲਾਂ
ਲੱਖ ਚੁਰਾਸੀ ਜੂਨ ਦੀ ਛੱਲਾਂ
ਤੂੰ ਵੀ ਕੱਲਾ ਮੈਂ ਵੀ ਕੱਲਾ
ਚੱਲ ਆਪਾਂ ਦੋ ਗੱਲਾਂ ਕਰੀਏ
ਨਾ ਵਿੱਚ ਕੋਈ ਕਾਸਿਦ ਤੇਰਾ
ਨਾ ਹੀ ਕੋਈ ਭਰਮ ਦਾ ਫੇਰਾ
ਨਾ ਕੁੱਝ ਤੇਰਾ ਨਾ ਕੁੱਝ ਮੇਰਾ
ਚੱਲ ਆਪਾਂ ਦੋ ਗੱਲਾਂ ਕਰੀਏ
ਨਾ ਮੇਰੇ ਸਿਰ ਵਿੱਚ ਮੇਰੀ ਮੈਂ
ਨਾ ਤੇਰੇ ਦਿਲ ਵਿੱਚ ਅਜ਼ਮਤ ਤੇਰੀ
ਮੈਂ ਖਾਲਿਕ ਦਾ ਖਲਕਤ ਤੇਰੀ
ਚੱਲ ਆਪਾਂ ਦੋ ਗੱਲਾਂ ਕਰੀਏ
ਤੂੰ ਮੈਂ ਦੇ ਵਿੱਚ ਫਰਕ ਨਾ ਕੋਈ
ਫਰਕ ਇਹ ਪੈਦਾ ਕਿਥੋਂ ਹੋਇਆ
ਤੇਰੀ ਜਾਤ ਸੋ ਮੇਰੀ ਜਾਤ
ਬੇਜਾਤਾ ਵਿੱਚ ਕੋਣ ਖਲੋਅਾ
ਚੱਲ ਆਪਾਂ ਦੋ ਗੱਲਾਂ ਕਰੀਏ
ਤੂੰ ਜਾਣੇ ਜੋ ਦਿਲ ਵਿੱਚ ਸੱਭਦੇ
ਕੁੱਝ ਪਾ ਗਏ ਕੁੱਝ ਫਿਰਦੇ ਲੱਭਦੇ
ਪਰ ਇਸ਼ਕ ਰਕੀਬਾਂ ਨਾਲ ਨੀ ਪੁਗਦੇ
ਚੱਲ ਆਪਾਂ ਦੋ ਗੱਲਾਂ ਕਰੀਏ
ਤੂੰ ਮੇਰਾ ਬਣ ਕੇ ਸਾਮਣੇ ਆ
ਆਪਣੀ ਹੋਂਦ ਜਲਾਲ ਦੇ ਅੰਦਰ
ਕਿਉਂ ਲੱਭਣਾ ਤੈਨੂੰ ਇਨਾਂ ਅੋਖਾ
ਜੇ ਵਸਦਾ ਤੂੰ ਸੱਭਦੇ ਅੰਦਰ
ਚੱਲ ਆਪਾਂ ਦੋ ਗੱਲਾਂ ਕਰੀਏ
ਕੋਈ ਰਾਹ ਇਸ਼ਕ ਦਾ ਵੱਖਰਾ ਦੱਸ
ਜੋ ਹਰ ਮਜ਼ਹਬ ਤੋਂ ਪਾਰ ਹੋਏ
ਜੋ ਰਾਹ ਕਾਫਿਰ ਨੂੰ ਦੱਸੇ ਦੂਨਿਆਂ
ਉਸ ਰਾਹ ਤੇ ਤਾਂ ਸੱਭ ਖੁਆਰ ਹੋਏ
ਚੱਲ ਆਪਾਂ ਕੁੱਝ ਗੱਲਾਂ ਕਰੀਏ

ਜਗਜੀਤ ਸਿੰਘ ਕਾਫਿਰ
10/07/2016

ਗੁਨਾਹ

ਗੁਨਾਹ
ਕੌਣ ਇਸ ਤੋਂ ਵਾਂਝਾ
ਹਕੀਕੀ ਜਾਂ ਮਜਾਜੀ
ਕਿਉਂ ਇਸ ਤੋਂ ਸ਼ਰਮਸਾਰ ਹੋਣਾ
ਇਹ ਵਜੂਦ ਦਾ ਹਿੱਸਾ
ਮੈਂ ਤਾਂ ਨਹੀਂ
ਕੀ ਤੂੰ ਹੈਂ ਮੇਰੇ ਨਦੀਮ
ਪੁੱਛ ਆਪਣੀ ਰੂਹ ਤੋਂ
ਉਹ ਲੱਜਤ ਉਹ ਖੁਮਾਰ
ਇੱਕ ਪਲ ਦੀ ਜਿੰਦਗੀ
ਵੱਡੀ ਹੈ ਉਮਰ ਦੀ ਭਟਕਣ ਤੋਂ
ਇਹੋ ਤਾਂ ਸਰਮਾਯਾ ਹੈ
ਤੇਰੀ ਮੇਰੀ ਹੌਦ ਦਾ